يا تري مين عنده حق .......؟؟؟؟

[Infinity]

يا تري مين عنده حق .......؟؟؟؟
بسم الله الرحمن الرحيم
أنا طالب فى قسم هندسة البترول وطبيعى أنا زى كل شباب القسم اللي زعلوا جدا بسبب مواعيد سكشن الرسم الميكانيكي وأنها يوم الخميس ومتأخرة جدا بالنسبة للناس اللى بتسافر ولذلك قام رجالة القسم بالسعى خلف ذلك الموضوع كلمنا المعيد وحاولنا تغيير الميعاد وفعلا بعد ما ناقشنا مواعيد كتير مع المعيد وصلنا لميعاد يوم الأربعاء ولكن بعد دا كله الكلام دا لم يرضى شباب قسم تكرير الذين وجدوا أنفسهم الوحيدين فى يوم الخميس بعدما غير كل قسم مواعيده وانقلبت الترابيزة فجأة وهدوا القلعة على دماغنا كلنا طب دلوقتى أنا نفسى أفهم وأعرف إجابة لكام سؤال .......؟؟؟؟؟؟
ليه شباب تكرير فكروا بنظام فيها لأخفيها .......؟
ليه محاولوش مع المعيد عشان يغيروا ميعادهم هما كمان بدل كل ده .......؟
ليه زنقوا مواعيدنا وهما عارفين أن جدولنا زحمة جدا والأيام مش ناقصة بعزقة .......؟
مش كان الأفضل بيقول أن الفرصة اللي يحصل عليها أحد حلال عليه وعقبالنا ولا إيه يا شباب ....؟
طب دلوقتي شباب جيولوجيا ومناجم رجعوا الخميس بدل الأحد وبترول وفلزات رجعوا الخميس بدل الأربعاء ..... تكرير استفاد إيه ........؟
هل تكرير كان من حقه أنه يعمل المشكلة دى من الأساس ولا هما غلطانين ولا إحنا اللى غلطانيين.........؟
ياترى مين عنده الحق.......؟

[SleeplessHeart]

اولا موضوعك حلو

وعندك حق ف الكلام

بس انت كدة عممت

الى عمل كدة واحد بس من تكرير مش القسم كله زي مانت بتقول

انا لما طلع وقال كدة سبت المحاضرة ومشيت وكبرت دماغي

عشان عارف انهم هيتخانقوا في الاخر ودا الى ححصل فعلا ....

ياريت تخصص مش تعمم

[كريم الباشا]

فعلا عندك حق
وهما لو كانوا صبروا شوية كان ميعادهم بقى الاربع بعد قسم حفر والكلام ده على لسان المعيد
انما لما صمموا وعملوا المشكلة الدكتور قال كله هيكون الخميس ومفيش ولا أحد ولا اربع يعنى كله قاعد



مين بأى المستفيد دلوقتى؟؟؟؟؟؟؟

[mankind]

يعني هما شباب تكرير مش بشر ليهم أهل وعايزين يسافروا زي شباب بترول وعلى فكرة الموضوع فيه أنانية من الناحيتين

[CRISTIANO RONALDO]

فعلا مشكلة كبيرة اتمنى اى حد من قسم تكرير وكل واحد ينوب عن قسم من الاقسام ويروحوا للدكتور ويتاسفوا عن اللى حصل
ويحاولوا يرجعوها تانى
ويا رب تتوفقوا

[abdlrahman90]

ياعم هو حسن قوطة ده سبب المشكلة يعنى هما الخميس الاولى والتانية اما احنا التالتة والرابعة وبعدين يعنى هى جات على قسم حفر اللى مضايقهم مهما كده مستفادوش اى حاجة وكانوا هيحضروا معانا الاربعاء يعنى على كده الناس بقى اللى فى محافظات بعيدة هتقضى الترم كله فى السويس وكنا جايبين معانا الشنط وهنروح الاربعاء لكن رجعناها تانى عشان حسن قوطة ورفاقة يستريحوا وقال ايه بيسقفولوا فى المحاضرة عشان قعدنا للخميس حاجة غريبة والله

[الشاعر]

السلام عليكم..
أولا.. أنا حسن قوطة.. وبالصدفة العجيبة جدا اكتشفت الموضوع ده..

ثانياً: كويس أوي ان انا جيت متأخر.. عشان يكون كل عضو قال اللي نفسه ونفسيته ارتاحت..

ثالثا: عاجبني أوي إخلاء الطرف من العضو التكريرجي (.........) في رده هنا ع الموضوع..
هههههههههههههههههههههه
طب كنت تعالى كلمني في الموضوع ده يا راجل..


رابعا: أحب أرد على أسئلة العضو صاحب الموضوع:

ليه شباب تكرير فكروا بنظام فيها لأخفيها .......؟

فعلا الزميل التكريريج عنده حق.. بلاش تقول شباب تكرير.. لأن حسن قوطة بس هو اللي اتكلم.. بس برضصو ماننساش إن لما الدكتور طلب في المحاضرة مندجوب من كل قسم.. حسن قوطة استنى لما حد يقوم من تكرير.. ومحدش كالعادة قام لأنهم عارفين إن حسن قوطة هو كبش الفدا بتاع القسم.
وبعدين ايه نظام فيها لاخيها ده يا راجل .. عيب عليك ده احنا ولاد دفعة واحدة.. ههههههههههههه.. اهدى بس كده وتعالى نتناقش.

ليه محاولوش مع المعيد عشان يغيروا ميعادهم هما كمان بدل كل ده .......؟


مين قال اننا محاولناش؟. احنا ليلة الحوار ده.. كنا متصلين بالمعيدة المسئولة ومتفقين على الوصول لميعاد في يوم الأربعاء بإذن الله..

ليه زنقوا مواعيدنا وهما عارفين أن جدولنا زحمة جدا والأيام مش ناقصة بعزقة .......؟


طب ما كل الدفعة كان جدولها زحمة.. يعني كلنا في الهوا سوا.. مش كده وللا ايه؟

مش كان الأفضل بيقول أن الفرصة اللي يحصل عليها أحد حلال عليه وعقبالنا ولا إيه يا شباب ....؟


لما تكون الفرصة متاحة لكل الأقسام.. ولكن الدكتور يتيحها لقسم واحد فقط..
يبقى ده اسمه ايه؟؟ متهيألي اسمه "عدم مساواة".. ومن حقي ومن حق أي واحد في قسمي أو ف أقسام فلزات وجيولوجيا ومناجم إنه يرفض القرار ده من الدكتور ويناقشه فيه.. ولكن لأن المتضرر الوحيد من القرار ده كان قسم تكرير فقط (لأن الباقي كان متفق على مواعيد تانية .. مش متأكد فلزات كانت مظبطة موعد تاني وللا لا) .. فأنا اللي اتناقشت مع الدكتور..

وبعدين أنا قلت للدكتور ايه؟؟
أنا قلت بالنص كده : (يا دكتور طالما حضرتك وافقت إن قسم حفر يحضر يوم الأربع يبقى من حق أي قسم إنه يحضر يوم الأربع) مش أكتر من كده كلمة واحدة.
الكلام ده فيه أنانية؟؟ بالعكس.. ده مطالبة بالمساواة.

ولا مؤاخذة يعني لو كان الموقف بالعكس.. وكان قسم حفر هو المتضرر. الله أعلم كان هيكون وجه الاعتراض ايه.

وأحب أذكر كل حفرجي باللي حصل معايا بعد ما خرجنا من مقابلة الدكتور.. ومش هتحرج من الكلام اللي هقوله لأن ده اللي حصل.

أنا طلبة حفر اتجمعوا عليا. أكتر من 15 شخص.. كله بيزعق وبيتخانق وبيزق في وقت واحد. وأنا طبعا عامل زي الفرخة البايشة وأنا مزنوق في الحيطة..
ههههههههههههه. كان موقف عجيب والله.
بس ربنا يكرمه زميلي من حفر اللي (انتشلني) بعيد عنهم...

أنا يا جماعة معملتش حاجة غلط.. أنا كان نفسي أحقق المساواة بين كل الأقسام.
بس رد الفعل من حفر كان غير لائق بالمرة تجاهي..

وبالنسبة للموضوع اللي الزميل العضو كاتبه هنا.. كان الأفضل تدعوني للمناقشة بدل ما كل واحد يدخل يقول اللي في نفسه عن واحد مش موجود.
(وشكرا جزيلا لإدارة هذا الموقع الشقيق)

[ahmed_totta]

يا حسن الموضوع ده بتاريخ شهر مارس 2009
انا عدلت كلمة واحده بس ربما تكون زعلتك . اتمنى تكون هيا اللى شلتها

[AbdoHolmez]

يا حسن احيانا يكون الصمت ابلغ من اى رد